قصيدة : مساء الفل على الحلوين
كتب : عمر أحمد عبد العزيز
مساء الفل على الحلوين
مساء الفل على الغزلان
اه يا جميل لو تعرف قد ايه أنا عطشان
عطشان اشوفك واغرق في عيونك الحلوين واروح
عطشان المس كفوفك الدافين وادوخ
في تاريخ الأرض بقالنا كام أسبوع مشوفناش بعض
بس في تاريخي بقالنا شهور وسنين
وحشتيني
وحشتيني بكل اللغات اللي في العالم
ووحشني كلامنا وحكاوينا
والتمشية على كورنيش النيل
ووحشني حتى خناقنا والتبيوز ساعتين
عايز احكيلك عن أيامي في بعدك
وان مليش في الدنيا ونيس بعدك
كنت بنام زي ما بصحى
ملل ورتابة
مكنش بيصبرني على يومي إلا انتظاري إننا نتلاقى
واديكي أخيرا قدامي
والعين قدام العين
مساء الفل على الحلوين
تشرب ايه يا جميل
مانجا ولا المانجا تغير ؟
انا عارف انك بتحبي البرقوق
بس انسي أصلي بغيير
التليفون يتعمل سيلنت
مش عايز حاجة تشغلنا
نفصل عن العالم حبتين
نتخيل مثلا اننا قاعدين في جزيرة لوحدينا
والبحر محاوطنا من كل ناحية والقمر بيبص علينا
يا أجمل من القمر ذاته
يا حورية جت الأرض قبل الأوان بأوان
بحبك ..بحبك بكل الطاقة اللي جوايا
وبحب نفسي لأني بحبك
وبحب الحب اللي خلاني في يوم أحبك
ومهما تمر الأيام هحبك اكتر من زمان
ياريت الوقت يعدي قوام وتنتهي المسافات
وتصبح يا جميل بقى معايا طول الأوقات
مساء الفل على الحلوين
تابعنا على جوجل نيوز
