بر الأبناء واجب علي الوالدين

بر الأبناء واجب علي الوالدين
كتبت غرام خطيطة

قبل ما ادخل في الموضوع حابة أقول إن البوست طويل بس ده لأهميته وحابة أأكد إن بر الأبناء واجب على الوالدين بشكل فطري وإنساني وديني .. وده مش معناه إننا نبرر التقصير مع الأهل أو نشجع على عقوق الوالدين في مقابل أي تقصير أو خطأ أو حتى أذى .. وكلامي بس عايزة أوجهه للأهالي اللي بيقصروا أو بيسببوا أذى لأولادهم بأي شكل من الأشكال أو بيستخدموا التقديس الديني لبر الوالدين لتمرير التقصير المقصود أو الأذى ..

وكلامي أوجهه في البداية للأبناء وانصحهم بعدم التحامل على الوالدين .. ولازم تفهم إن طبيعي يكون في تقصير منهم ناحيتك فى أي جانب لإنهم بشر وليسوا ملائكة .. ومفيش حساب بيننا وبين أهالينا سواء على أي حاجة مقصودة أو غير مقصودة، إحنا مأمورين بالبر والتعامل بالإحسان والمعروف في الدنيا .. وأي أذى ده حسابه عند ربنا هيفصل بيننا فيه يوم القيامة …

وبر الوالدين مُعظّم أكيد على بر الأبناء .. وده لأن بر الوالدين ممكن مايكونش أمر فطري ويحتاج لتقديس ديني وإلهي علشان نقدر أهالينا .. لكن بر الأبناء يفترض إنه فطري وإنساني وإجباري على كل الكائنات وعلى كل أب وأم تجاه أولادهم من أول لحظة منذ مرحلة الحمل .. يعني من وانت لسه في بطن أمك، الوالدين المفترض بيقوموا بواجبهم الفطري .. إن فترة الحمل دي تعدي عليك بحرصهم واهتمامهم ده اسمه بر أبناء .. وإنهم يأكلوك ويشربوك ده بر أبناء .. إنك تكبر في أمان ده بر أبناء .. إنك تتعلم ده بر أبناء .. سنين طويله من البر تجاهك ..وانهم يكونوا حريصين علي وضعك علي الطريق الصحيح ده بر ابناء.

شايف بقى سنين عمرك دي كلها لحد الوقت إللي بتقرأ فيه الكلام ده هو الوقت اللي بيبرك فيه أبوك وأمك وانت مستخسر الوقت القصير اللي هتبرهم فيه من أول ما بلغت سن الرشد .. ممكن تبقى أيام أو شهور أو سنين قليلة جداً !! فخليك رحيم بأي تقصير أو خطأ غير مقصود وواجبك إنك تسامحهم عليه ..

وتركيزي على بر الأبناء المرة دي هدفه توعية الأهالي لإن دايماً بنتكلم عن بر الوالدين بس بننسى حاجة مهمة وهي إن العلاقة بين الأهل وأولادهم هي علاقة من طرفين مش من طرف واحد .فمتجيش تردد لهم دايما بانهم لازم يبروك لان الله امرهم بكده وتنسي انوا كمان انت لازم تبرهم برعايتك ليهم وتربيتهم تربية سليمة علي المبادئ والاخلاق . ولكل أب وأم انت تقدر تختار إنت عايز ابنك يبرك ولا مجرد يصاحبك في الدنيا بالمعروف .. وزي ما هتزرع في ولادك وهما صغيرين هتحصد برهم بعد كده ..

وزي ما لكل قاعدة شواذ .. زي ما في أب وأم كويسين .. طبيعي يكون في أب وأم مؤذيين .. بيسببوا الأذى لأولادهم نفسياً وجسدياً .. وأحياناً في منهم بيستغل تقديس بر الوالدين الديني في تمرير الأذى .. وإن الأولاد مجبر يتحمل أي أذى علشان إنت أب أو أم تملك حصانة دينية ومجتمعية .. ودي مشكلة بيعاني منها ناس كتير تعرضوا للأذى الأسري تحت ستار الدين وبر الوالدين ..

ورسالتي لأي حد بيتعرض لأذى سواء نفسي أو جسدي من أب أو أم .. افهم إن في حدود لكل حاجة .. تقدر تستشير حد مختص يساعدك تتعامل في مشاكلك مع أهلك .. وتقدر تبرهم وتحسن إليهم في مقابل أذاهم بإنك تصاحبهم في الدنيا بالمعروف .. يعني تقوم بواجباتك تجاهك مش تقاطعهم او تتعامل معاهم بجفاء لانك هتتحاسب من الله علي هذا السلوك .. وتفضل جنبهم وتساعدهم .. تتكلم معاهم باحترام .. وتفضل تتعامل بإحسان وفي نفس الوقت تحمي نفسك من أي أذى ..

في النهاية، بر الأبناء مش بس مجرد تحقيق حق وواجب اجتماعي، بر الأبناء هو في الحقيقة رحلة مشتركة بين الأبناء والوالدين، رحلة بتحتاج للتفاهم والتعاون والاحترام المتبادل، ومفيش رحلة ناجحة بدون لغة تواصل وحوار مباشرة ومستمرة .. لو مفيش تفاهم واحترام واضح بين الأبناء والوالدين، في حلقة وصل هيتم فقدها في العلاقة وهتبقى الفجوة كبيرة وبالتالي تزيد المشاكل.

وزي ما الأبناء بيحتاجوا تربية ودعم، كذلك الأهالي محتاجين يشتغلوا على نفسهم ويثقفوا نفسهم في مجال التربية ويسمعوا من أولادهم ويقربوا ليهم ويستشيروا متخصصين علشان يقدروا يقوموا بدورهم بأفضل شكل ممكن ..