لا مش هانسى
بقلم / أحمد عبد الرازق الزعويلي
مش هانسى
ولا هسامح يوم
كان غدرك يزيد
مافكرتش يوم
في حالي بعدك
ولا صدمتي أنا
واللي عرفك
كنت اشوف
الفرح من نظرة عنيك
ماكنتش انام غير لما
تغمض عنيك
وافضل ابص في وشك
يمكن تصحى
وأشوف منك
لمسة إيديك
كنت أرجع
من بره أجري عليك
حسيت صوتك يندهلي
اترمي بين ذراعيك
وحسيت روحي مرة
تتنفس من رئتيك
وروحت مع الأيام
وهونت عليك
يا ترجعلي قلبي
يا تقتل وجدي
اللي هايم
ف الدنيا بيدور عليك
مين قال اللي يحب
مايكرهشي
دا يكره ف الدنيا قلبك
واللي حواليك
يا ليل الصبر
وتنهيدة فجر
أتمنى ما يطلع
بكره عليك
لا بعيد الشر
عن روحك وعنيك
عيش وانساني
وما ترجعش تاني
خلاص خدت كل
اللي فاضل ليك
كان فيه دقتين
مع القلب راحوا
وكان فيه قلب خايب
سمع عن الحبايب
وافتكرك منهم
لكن انت جنيت عليه
مش قادر اصدق إنك
سراب سعيت اليه
هجرت خلاني
وبعت وجداني
ما سألت ليه
نفسي ما أشوفك
ولا ألمح طيفك
في طريق ف شارع
أنا صعبت عليه
راح يواسيني ويقولي
خلاص باع
ما كل خاين يخطف
مشاعر ما يصونهاش
هيفضل اناني
والبوصلة تاني
مش هتدور خلاص عليه
إن راح شرق روح غرب
مش كل القرب
بيصنع حب يبقي
أو يصعب عليه
