خريجة علوم جامعة طنطا، والإنجاز العلمي المهم..
سيدة مصرية وزوجها يبتكران جهازا لتنشيط المخ يعمل دون بطارية
اللي قدامنا في الصورة دي سيدة مصرية اسمها إسراء الصناديدي، قدرت هي وزوجها المصري أيضا إسلام موسى، من ابتكار جهاز هو الأول من نوعه لتنشيط المخ يعمل بدون بطارية وبيعتمد على الشحن عن طريق حركة التنفس بالجسم.
طب وإيه يعني ما جهاز تنشيط المخ موجود من سنين!!
لا.. الموجود ده جهاز بيشتغل ببطارية، والجهاز بيتزرع تحت الجلد في الصدر وبتتوصل منه أقطاب للمخ، والجهاز ده مهم جدا لعلاج عدة أمراض زي الشلل الرعاش وبعض الأمراض النفسية مثل OCD والاكتئاب الحاد المقاوم للأدوية.
بس المشكلة إن الجهاز الموجود والمعروف من زمان إنه عشان بيشتغل ببطارية فعمره الافتراضي لا يتخطى 3 سنوات وبعدها بيحتاج المريض الخضوع لعملية جراحية تاني إما لتغيير الجهاز أو شحن البطارية، وده أمر مؤلم ومكلف وخطر كمان على صحة المريض.
إسراء بقى قدرت خلال دراسة عملية أجرتها بجامعة كونيتيكت في الولايات المتحدة لنيل درجة الدكتوراة إنها تبتكر جهاز جديد بيتزرع مرة واحدة طول عمر المريض ولا يحتاج أي تدخل مرة تانية لأنه بيشحن عن طريق حركة الرئتين في التنفس.
متخيلين ده إنجاز عامل إزاي وحجمه قد إيه؟
الجهاز حسب ما قالته إسراء وزوجها في حديثهما معي خضع للتجربة على الحيوانات بالفعل وثبت نجاحه في الشحن عن طريق التنفس، ولسه هيخضع لتجارب تانية قبل استخدامه للبشر.
تم نشر نتائج الدراسة في واحدة من أهم المجلات العلمية المهتمة بالفيزيات والعلوم الحيوية في الولايات المتحدة وهي مجلة Cell reports physical science.
الدراسة كانت إسراء هي الباحث الأول فيها وزوجها ضمن فريق الباحثين الآخرين اللي ضم متخصصين من جامعات في أمريكا وسويسرا.
إسراء الصناديدي اتخرجت من كلية العلوم بجامعة طنطا قسم الكيمياء الحيوية وكانت الأولى على دفعتها عام 2010، وسافرت إلى الولايات المتحدة مع زوجها وحصلت على درجة الدكتوراة من جامعة كونيتيكت، وحاليا تعمل عالم أول في معامل أسترازينيكا بالولايات المتحدة.
أما زوجها إسلام موسى فتخرج من كلية العلوم بحامعة طنطا أيضا عام 2006 وتم تعيينه معيدا بها وحصل فيها على درجة الماجستير ثم انتقل للولايات المتحدة وحصل على الدكتوراة في الكيمياء الحيوية من جامعة كونيتيكت.
إسلام موسى كنت نشرت قصته قبل كده لما تمكن مع فريق بحثي أمريكي من التوصل إلى منظم صناعي لضربات قلب الإنسان يعمل بطاقة الجسم ولا يحتاج إلى بطارية، ثم تحول إلى رجل صناعة وأسس شركة متخصصة في إنتاج تقنيات الطاقة النظيفة وحصل على جائزة مرموقة كمؤثر في الصناعة .
خريجة علوم جامعة طنطا، والإنجاز العلمي المهم
