جيب اخرك وكن كسبان
كتبت/وفاء المصري
اتعوّدت في حياتي أمشي بمبدأ متعب شوية هو ” إني أجيب آخري
بجيب آخري في عطاء – جهد – قبول وتقبٍل – تنازل حتى
حتى الزعل بردو لازم أجيب آخري ….الغضب – الانفعالات _المحبة _ الإيثار _ الانصات _والصبر تاني مرة الصبر
بفضل آجيب آخري في احترامي لك وفرض حُسن النيّة لآخر نَفَس …..لحد ما يظهر الوش الحقيقي للشخص ده …زي ما تقول كده بستنى هو كمان يجيب آخره ….
وقتها بيبقى حاجة من اتنين ….
يا إما الأيام هتثبت لك إنه فعلاً جدير بإحترامك وإنه كان عند حُسن ظنك بيه …أو العكس تماماً وتكشف لك المواقف والأيام ….إنه ماكانش قد الثقة ولا الاحترام ولا التقدير ولا التعامل بآدمية من الأساس
وقتها بيني وبيني نفسي فعلاً بقول ” كده عظمة على عظمة اوووي
حاجة من اتنين هنا لازم تعملهم
يا هترد الألم بألم واتنين وتلاتة وأربعة
يا هتتقبّل وتفوّت و ده مش ضعف منك ولا حاجة…ده اسمه تغافل عن الأذى لأنك مازلت الأرقى والأنضف
ولأنك في الحالتين طلعت بدرس محترم في سلوكيات البشر
أنا بجيب آخري عشان ما أندمش لحظة واحدة إني قسيت أو اتغابيت او اخدت موقف يزعّلني من نفسي…
أنا بجيب آخري عشان ما ارجعش لحظة واحدة ألف وأبص ورايا على شئ كان أتفه من إني أعمله قيمة. ..
بخلص البنزين كله في محاولة تصديق انك تمام لحد اخر لحظة ، عشان ما اندمش اني ما منحتش فرصة وما اندمش اني ما صبرتش …..بسيبك خالص لحد ما تثبت نيتك
يعني تقدر تقول بعمل اللي عليا ، عشان يوم ما امشي …امشي وانا مرتاح الضمير والبال …
أنا بجيب آخري عشان الصح إنك تصبر وما تحكمش ع الأمور من أول وهلة ….انت لازم تصبر عشان تقيس وتشوف بنفسك حجمك الحقيقي في عيون الشخص ده ما ينفعش الحُكم من أول ماتش عموماً …اومال همّا بتوع الكورة عملوا الشوط التاني ليه وبينهم استراحة
عشان وقت ما يصفر الحكم و الكسبان ينزل يبوس الأرض والخسران وقتها هيتمنى الأرض تتشق وتبلعه ..
جيب آخرك …عشان لسه في كتير حاجات هتظهر لك وهتبهرك …
تابعنا على جوجل نيوز
