التعويم وتأثيره علي الاسعار قبل شهر رمضان
بقلم : حماده عبد الجليل خشبه
التعويم ؟
هل هو دا الوقت المناسب ؟
هل دا يؤثر علي الاسعار ؟
نتعرف معا خلال هذا المقال ونرد علي السؤالين السابقين من خلال هذا المقال .
التعويم . كلمة تعويم يعني اترك الجنيه للعرض والطلب كل ما يزيد الطلب علي الجنيه سعره يزيد ، وكل ما يقل الطلب علي الجنيه سعره ينخفض وكل ما يزيد الطلب علي الدولار قيمة الجنيه تقل أمام الدولار والعكس صحيح .
من وجهة نظري الوقت دا مناسب جدا للتعويم ، ليه ؟ واقولك ليه ، اولا انت كنت بتعانى من فجوه دولاريه صعبه جدا والدولار كانت حبساه امريكا في البنوك بتاعها وان هنا في مصر كان الاقتصاد صعب جدا ناحية عوامل كتير منها الحروب الروسيه الاوكرانيه والاسرائيلية علي قطاع غزه والحرب في السودان وفي ليبيا وزاد الشعر بيت الحوثيين واللي بيعملوه في البحر الأحمر ودا قلل من دخل قناة السويس بصوره ملحوظه جدا تجاوزت عملية الانخفاض في إيرادات قناة السويس ال 60 ٪ واتحصرنا اقتصاديا ، واصبح مفيش دولار موجود في بنوك مصر يغطى احتياج المستورد فاشتغلت السوق السوداء ووصل فيها الدولار الواحد ل 70 و ال 75 جنيه .
ولما مشروع رأس الحكمه بدأ رئيس الوزراء يعلن عنه ، انخفض سعر الدولار في السوق السوداء الي 40 جنيه .
طبعا وقت سعرين للصرف في اي دوله مش حلو خالص لأي مستثمر جي يستثمر في بلدك وفي نفس الوقت هيكون حذر جدا لو استثمر اصلا .
اخذت الحكومه في إجراءات من ضمنها تحرير سعر الصرف ووحدة سعر صرف الدولار في البنوك ل 49 تقريبا يعني اكتر من سعر الصرف في السوق السوداء دا معناه موت ودفن السوق السوداء أمام تعاملات البنوك ، ودا طبعا بفضل مشروع رأس الحكمه اللي سد الفجوه دى ، بالبلدي كده يعني مفيش دولار هيتباع خارج البنوك ، ومفيش مستورد هيلاقي صعوبه في الدولار علشان اصبح متوفر في البنك .
انا بالنسبه للأسعار ،دي بقه فيها كلام كتير ، التجار الكبار كانوا نسعرين بضاعتهم علي سعر الدولار القديم اللي هو 70 جنيه ، ولما انخفض سعر الدولار ل 40 الي 49 جنيه التجار المفروض ينزلوا السعر إنما بقه صعب عليهم انهم شاريين بسعر غالي ويبيعوا دلوقت بسعر ارخص معنا كده أنهم هيخسروا كتير فقرروا مع نفسهم أنهم مينزلوش السعر اللي لما البضاعه اللي مشترينها بسعر اغلي تخلص ، مع انهم كانوا مشتريين بضاعه في الاول بسعر رخيص وباعوا بالغالي لما سعر الدولار رفع ، وطبعا اللي بيطحن في الوسط هو المواطن الغلابان .
لازم الرقابه علي الاسعار تكون شديده شويه وتسعر السلع ويكون معروف سعرها للمواطن علشان محدش يضحك عليه .
الاسعار من وجهة نظري هتنزل تدريجيا من بداية شهر رمضان ، ودا ليه علشان الإفراج الجمركى للسلع اللي كانت موجوده في الميناء تمت الحمد لله ، ثانيا علشان التاجر مش عايز يشترى اى حاجه لما يشوف السعر الدنيا هتستقر ولا ايه وبالتالي موقف شغله لا عايز يبيع ولا عايز يشتري ، لكن مع وجود ضخ للسلع اللي أفرج عنها هيتم البيع والشراء باسعار منخفضه عن ما قبل شهر رمضان .
كل عام وانتم بخير
حفظ الله مصر وشعبها
تحيا مصر
