أنا شاعر
بقلم/ عادل محمود
أنا شاعر
مجروح بكلامه
وقصايدي بتحكي
عن همي
أنا شاعر
ضاعت أحلامه
وحبر أقلامي
من دمي
أنا واحد
في وسط الناس
بعاني بقاسي
من الدنيا
بحلم كتير
ألاقي إخلاص
أنام وأصحى
بحاله تانيه
بس حلمي
بيفضل حلم
وفي بالي
زي السما
إللي فيها النجم
عارف إنه
مستحيل يتنال
جايز أكون
أنا الظالم
ومش بعيد
أكون مظلوم
مش عارف
حالتي ف الدنيا
بس عارف إن
أنا مهموم
ساعات بسأل
كتير نفسي
ودايماً مش بلاقي جواب
ظالم نفسي أنا بنفسي
ومدوقها بإيدي عـــذاب
أيوه أنا أنسان
محبوس وأنا السجان
ولو تسأل تقول أزاي
أكيد مش هلاقيلك رد
أنا واحد رايح جاي
أحلامه بتتهد
ومش عارف
العيب فيا؟!
ولا العيب في الظروف؟
ولا بحلم حلم مش ليا ؟
ولا بيعترض
طريقي الخوف؟!
أنا شاعر
مجروح بكلامه
أنا واحد
في وسط الخلق
نفسي ألاقي
الخير في الناس
نفسي أعيش
بإحساس وبصدق
تابعنا على جوجل نيوز
