أنا الإنسان
أنا المصرى أنا الإنسان
أنا المطحون فيكِ
يادنيا بقالى زمان
أنا النجار والأستورجي
وأنا البنا أنا التعبان
أنا العامل وأنا الصانع
وصنعتى للشرف عنوان
أنا اللي باكلها من عرقى
ومش طالب
من الغني إحسان
أنا مطلبي أكون عايش
وسط البشر إنسان
أنا الفلاح وده فاسي
وبيه شقيان
وباشقى عشان لقمتي
وأهلي ومصر كمان
لا أنا حرامي ولا طامع
في كرسي وكام فدان
أنا اللي حاربت
في أكتوبر كما الفرسان
أنا اللي شربت المرار سوبر ومن المرار طفحان
أنا المصري الشريف الحر
وضميري فى العمل بميزان
ولقمتي ب إيدى وعرقي
بس أعيش في أمان
وأمانى فيكِ يابلدي
ألاقى لقمتى وسكني
وأعيش إنسان
بقلم الشاعر/ فهمى محمود حجازى
