أشعار وقصائد

أنا أم فاشلة !!!

أنا أم فاشلة !!!أنا أم فاشلة !!!

بقلم الدكتورة:منة الله أشرف

مقالات ذات صلة

حالات كتير اوي مع اختلاف السيناريوهات تيجي بنفس العنوان ده….. أنا أم فاشلة !

والحقيقي أن هما بيكونوا فشلوا فعلا ،،،،
بس ف تعريف كلمة الفشل، مش ف أمومتهم !

والحقيقي اكتر ان مش هما بس ال فشلوا،
ده كتير مننا، ستات ورجاله وحتى اطفال بيقعوا ف نفس المطب….
مطب الحكم النهائي بالفشل، من غير حتى المداوله…
ما تيجي ناخد رأي أم دولت كده…. ايه رأيك

أولا اقفليلي خالص قناة صحبتي وجارتي وزميلتي ال عندهم ولادهم واجوازهم وبيعملوا وبيسووا وَبيروحوا وبييجوا، وانا قاعدة بروطه مكسحه بالعيال …

ونقفل بردو قناة التنمية البشرية وانت وَحْش الكون وهتقوم تكسر الدنيا وتطير بعيالك مع سوبر ماان إلى اللا نهائيه وما بعدها….

باظ يا دكتوره هو بتاع اللا نهائيه وَما بعدها..
ماهو اتوكس هو كمان وطلع اصلا مبيعرفش يطير،،،، تقريبا كان بيسمع تنميه بشريه

آمال افتح ايه يا دكتوره ؟
افتحي نفسك حضرتك
ايوه زي ما قريتي كده
افتحي نفسك من جوه وشوفي إمكانياتك انتي ايه ال ربنا خلقك بيها…

شوفي رزق ربنا ال قسمهولك ف نفسك وصحتك وعافيتك إيه…..

ايوه حبيتي والله ده رزق زيه زي الفلوس تمام.
فيه حد رزقه ف الباور والصحه والعافيه واسع اللهم بارك ((( زي ال عينك عليهم دول عارفاهم طبعا )))

وفيه حد رزقه فيهم قليل بردو اللهم بارك، لأنه اما بيبارك حضرتك بيفتح للإنسان طاقات، بتعدي اصلا إمكانياته،،،،

المهم هو يفتح
_ هو مين؟
الإنسان حضرتك، يفتح نفسه ويعرفها ويرضى بال ربنا قسمه له فيها، وال يرضى ربنا بيرضيه.. ((( الرضا لمن يرضى )))

طب والناس التانيين يا دكتوره
_ دول حبيبتى ((( ان كان فيك الله يعافيك )))
ربنا يباركلهم و يزيدهم من فضله ((( مالناش دعوه بيهم ))

ركزي ف إمكانيات ورزق حضرتك وخلينا نقفل الباب ده خالص ونتفق ((( فقه المقارنات مرفوض )))

اتفقنا؟
_ اتفقنا

بس كده يا دكتوره انا مش بضحك على نفسي كده وبريح الزبون عشان افضل ف مية اللفت ((( أو مية البطيخ ف قولٍ آخر ))) ؟

لا حبيبتي طالما اتفقنا اننا هنفتح نفسنا م جوه ونستكشفها بكل رضا أولا فنهدي ع نفسنا، ثم ييجي بعد كده حاجة اسمها (( فقه التعامل مع الامكانيات المحدوده ))

الفقه ده لو حضرتك شربتيه كل يوم ع الريق وقبل النوم، مع قرص رضا ويقين ف الله، (((صدقيني ))) مش هتصدقى نفسك سواء ع الراحه النفسيه ال هتوصليلها أو ع القوة الحياتيه ال هتحسيها ف يومك ومسؤوليات….

ايه الحوار ده بقي تعالي اقولك واصححلك المفاهيم الغلط جواكي…
_ يلا بينا

لو لقيت إني انتاجي وتحصيلي مع عيالي ف المذاكره مثلا ع أدي والخسارة ليا وليهم اكبر من المكسب الفعلي ف تقدمهم او ف طاقتي وطاقة اليوم، حتى وانا بحاول اتعلم واطبق حاجات م ال بسمعها دي م المختصين، ف بردو المحصله بالسالب يبقى
مش غلط ولا فشل ولا خيبه ولا وكسه اني استعين بصديق..
ياخدوا درس لو متيسر الأمر…
يسمعوا فيديوهات اون لاين بالشرح والحل…
الفت نظر مدرسينهم لنقاط ضعفهم وايدهم معايا
يبيتدوا يتعودوا يذاكروا وحدهم واتابع من بعيد…

ده حضرتك اسمه ((( فقه إدارة الموارد )))
فقه ، مش خيبة ولا فشل ولا وكسه

لو انا صحتي ع ادي ومش بقدر اشيل الشقه بصباع رجلي الصغير زي الأمهات السوبر هيرو ال حضرتك بتتفرجي عليهم ليل نهار دول يبقى
ميجراش حاجه اما استعين بحد يساعد معايا ف التنظيف لو متيسر….
اقسّم الدنيا ع اد صحتي وطاقتي وال مخلصش اليوم عنه ما خلص، مش احسن ماحضرتك تخلصي

ابتدي ادخل ولادي حبه حبه معايا ف التقسيمه،
مش عشان عاوزه نتيجه فوريه، لأ، عشان ع ال long run (( المدي البعيد يعني ))

ابتدي انزل بالسقف شويه(بتاع الستات اياهم دول) وافرح بأي حاجه أنجزها واكافأ نفسي كمان واحمد رب العالمين انه أعانني وقدرت ((( لئن شكرتم لأزيدنكم )))

بطبخ واتهلك وتطلع عيني….
مش لازم طبيخ يهد كل يوم..
قسمي الدنيا، يوم تقيل… يوم خفيف…يوم مفيش… عادي بتحصل
دليفري يوم لو متيسر…
خضار متوضب يوفر مجهودك لو متيسر..
مش متيسر، أو متيسر مجاش اصلا،
خلاص عنه ما جه، فضل ونعمة، والجود بالموجود

وال معانا وال منّا يتعودوا يشاركونا ف حدود طاقتنا، عشان يبقوا ف ظهرنا سند وايد بتطبطب وقلب بيعذر، مش حد عمال يزق ومبيرحمش…

تاني بتقول، (( ده اسمه فقه إدارة الموارد ))
فقه ، مش خيبة ولا فشل ولا وكسه

قيسي على كده اي حاجه ف حياتك.. مسؤولياتك… شغلك… علاقاتك… اجتماعياتك…
عيشي ع أدك
عيشي تحت سقفك انتي مش سقف الجيران

ومتنسيش (( قليل يكفيك خير من كثير يطغيك ))
والله ده ف الباور بردو مش ف الفلوس بس

ومتنسيش بردو (( خير العمل أدومه وإن قل))، صدقيني ده ف كل العمل بردو مش العبادات بس.

الفكره كلها ف الديمومه..
انك تفضلي ع الطريق…
حتى لو مش كل يوم بكامل نشاطك وحيويتك…
انتي ع الطريق…
مش متكهنه خرده ف الجراج…

سيبك من بتاع في نهاية كل يوم انتي أم مقصرة وزوجه خايبه وست معرفش مالها….

في نهاية كل يوم، انتي أم عظيمة عملت ال تقدر عليه بكل طاقتها….

المهم حبببتي تعرفي ايه هي طاقتك وحدود إمكانياتك وتتقبليها وتتخلصي من احساس العار والخزي والدونية، وترضي فربنا يراضيكي ويزيدك وََيباركلك ويفتحلك من حيث لا تحتسبي….

ثم تشغلي مخك ف ازاي تديري إمكانياتك عشان تاخدي احسن نتيجه من غير ما البطاريه توصل زيرور والعربيه تفصل كل شويه ونجيب ناس تزق..

وميجراش حاجه نتعلم ونسمع ونشتغل ع نفسنا ونطور ونكتسب خبرات م ال حوالينا، بس امتي ؟

بعد ما نحقق الكلام المكتوب فوق ده كويس ونصلح مفاهيمنا ونشحن طاقتنا ونصين موتورنا،
فساعتها نقدر نتحرك مظبوط ف الاتجاه السليم،
ومش كل حد يقولنا ع طريق نمشي فيه ملهوفين لمجرد ان هو مشي فيه ووصل…

اييييييييوه مظبوط
((( فقه المقارنات مرفوض )))

انا مديرة نفسي وملو هدومي
هفهم نفسي وهظبط يومي
هوقف حكمي بفشلي ولومي
هرضي وهَعَلِّي وهاوجِّه عومي
رفعت الجلسه…
ويلا يا أم دولت قومي

تابعنا على جوجل نيوز

قم بمتابعة موقعنا على جوجل نيوز للحصول على اخر الاخبار والمشاركات والتحديثات .. متابعة

مقالات ذات صلة

زر الذهاب إلى الأعلى
رجوع
واتس اب
تيليجرام
ماسنجر
فايبر
اتصل الآن
آخر الأخبار

أنت تستخدم إضافة Adblock

يجب عليك ايقافها لكي يظهر لك المحتوي